Lied zur Hochzeit
Geht's,
liabe Leut, paßt's do a Wengerl jetzt auf
A gånz a neuchs Liadl, des singan ma drauf.
Von da Liab wolln ma singan.
Für's Brautpåar soll's klingan
*Mir wünschn viel Glück und åm Ehstånd viel Freud.
mitsåmmen a herrliche Zeit.*
Des Gernhåbm, des Heiratn, des is hålt schön.
Mir wünschn für's Lebm, euch solls ållweil guat gehn.
Mir wünschn åll's Schöne
und Kinder a zehne.
*Wånn's über's Jåhr schrein dånn, de Wuzerl, de klan,
dånn wird's erst lebendig daham.*
Dir, Eva,
dir wünsch ma für d Zukunft viel Kråft,
daß'd ållas, wås du willst, ah immer guat schåffst.
Du hast jetzt an Månn,
der packt mit dir ån.
*Der is jetzt bei dir ålle Tåg daham,
jetzt derfst nimmer schlåfn allan.*
Du, Adam,
du brauchst nur dein Weg weitergehn.
Wånn d Eva
dir hilft, wirst scho sehgn, is des schön.
Du håst jetzt a Frau,
paßt zu dir genau.
*Wånnsd liab bist zu ihr immerzua,
dånn gibt der Herrgott sein Segn dazua.*
Wir wünschn euch zwa no a recht schöne Zeit,
und daß euch des Busserl in da Fruah ållweil gfreut.
Båld werd's as verstehn:
da Ehstand is schön.
*Und kumman dånn do a påar Wolkn? Ka Fråg.
Denkts zruck ån den heutigen Tåg.*
Zu singen nach der Melodie des Liedes "Wann i amål heirat", in Noten und auch in Griffschrift.
Diesen Liedtext habe ich verfasst und habe ihn immer wieder bei Hochzeiten gesungen, wobei ich nicht nur die Namen der Brautleute ändere, sondern meist auch den Text je nach Charakter der Brautleute anpasse.
