Leise rieselt der Schnee
Leise rieselt der Schnee?
Dass mir des wolln, is a Schmäh!
Wånns wirkli bei uns amål schneibt,
strahn ma Sålz, dass jå nix liegn bleibt!
In den Herzn wird’s wårm?
Jå, weil ma Zentralheizung håbm.
Für an Mitmenschn håbm mir ka Zeit,
hastn und jågn tan d’ Leut.
A Weihnachtsliad? Des is a Graus,
Zum Håls hängan de mir båld raus.
Siebm Wochen lång hör i des schon
im Kaufhaus, båld renn i davon.
Båld is die heilige Nåcht,
då gibt’s dånn an Karpfn, um Åcht.
Des Fernsehn, des rennt ah danebn,
ma muaß jå vom Kriag ålles sehgn.
Wer denkt dabei heut no ån’s Kind?
In da Krippn, im eiskåltn Wind?
In Frieden wollt’s bringan uns går?
Vor ungefähr zwaatausend Jåhr?
Von Weihnachten klingts überåll,
von fröhlich, vom glänzenden Ståll.
Viel fröhlicher singert i hålt:
Freut euch, da Frieden kummt båld.
